مراجعة وحدة التفاضل لمادة الرياضيات العلمي د. مصطفى العفوري وا.محمد صالح يوم الأثنين مباشر الساعة ال10 اضغط هنا

وهيك الحمد لله انتهى الصراع العنيف بالانتصار على الناس الي راهنت على فشلي

   2018-02-24 20:23:23

وهيك الحمد لله انتهى الصراع العنيف بالانتصار على الناس الي راهنت على فشلي

وهيك الحمد لله انتهى الصراع العنيف بالانتصار على الناس الي راهنت على فشلي


السلام عليكم . . . 

بدي احكيلكم قصتي مع التوجيهي

النجاح في مرحلة التوجيهي

طول عمري في المدرسة كنت ولا حبة عادا الصف الاول والثاني والثالث ف لما صرت صف  عاشر كنت ناوي اترك الدراسة نهائياً كونها حياتي كانت إهمال في إهمال من الصف الرابع حتى العاشر 

كنت ناوي اتعلم حرفة مهنية لانه كنت حافر صورة في عقلي انه انا لطخة بالمرررة ما بفهم ولا اشي بالدراسه 

لكن في شهر ١٢ من العام ٢٠١١ كان عنا عرس ف قادتني الصدفة اني اجلس مع زوج عمتي على نفس الطاوله وكالعادة آخر ربع ساعه بروحوا الناس الغرباء او المعازيم الرسميين 

ف بضل وقت للحوارات الشخصيه والعادية 

ف سألني زوج عمتي سؤال 

اللي هو شو ناوي تطلع او تعمل في حياتك و مستقبلك كونك بعد ست اشهر راح تنهي الصف العاشر ف كانت اجابتي انه انا انسان ضعيف دراسيا و لو درست ما راح تزبط معي و وصلتله الصورة الي كنت حافرها في عقلي انه انا بعيد عنكم لطخه 

ف اعطاني رأيه بكل احترام انه كلامي خاطئ و انا لازم اكمل تعليمي 

طرحتي امثله و امثله 

انا بصراحة حسيته قلب راسي تماماً و تحولت من انسان يائس و مُحبط لانسان صاحب إرادة قوية  بفضل الله ليس مديحاً بنفسي لكن جاييكم بالكلام 

طبعا سبق كثير و جلست مع ناس يحاولوا يقنعوني فشلوا كلهم بسبب اسلوبهم الغبي لكن زوج عمتي أسلوبه راقي جداً و بصراحة كلامه اثر فيي كثير و أثر علي بشكل كبير جدا جدا 

المهم خلص العاشر و اخترت تخصص الادارة المعلوماتية 

والآن دخلت ع التوجيهي اول فصل حملت خمس مواد

صح كان عندي إرادة واصرار لكن ما كان عندي لا تخطيط ولا عمل 

اللي حوالي طبعا قارنوا الماضي الشنيع تبعي في نتيجة التوجيهي ف الاهل في الدار قالوا انه انت مستواك مش تعليمي و انت ما بتنفع ما عندك قدرات و من هاي العبارات القاتلة لكن قلت لا انا بقدر و انا مصمم والا ما اوصل لهدفي و على العكسا إصراري زاد اكثر و اكثر و بلشت ادرس و اجت الامتحانات و جبت علامات خرافيه في مواد التخصص ف انبهر الجميع انه هاذ معقول يجيب هيك الي هم سبع مواد لكن رسبت انجليزي و هون بدأ نحس الانجليزي هساً ضل سبع مواد كنت موديهم فصل ثالث و اجينا للفصل الثالث لكن بداية شهر ٨ كنت احس اني دائما مزاجي مضروب  ف فجأة بيوم انا جالس لوحدي بتظهر  عندي الاعراض التاليه 

خفقان شديد جدا جدا لدرجه انه يفقدني صوابي 

و ضيق تنفس شديد 

و تنميل و الأطراف 

و دوخه و رعب و توتر و خوف شديد جداً 

اعراض لا توصف لشدة بشاعتها 

اعراض بتجعلني اجزم اني راح اموت

ف انا اول مرة حكيت يمكن شي عادي ما حيتكرر 

ف الغريب انه صارت الاعراض تتكرر في السيارة في الاماكن المزدحمة و المغلقه 

انا الان اهملت كلشي حياتي وقفت عند الحاله وضلت تتكرر الاعراض كل اكم يوم او كل ما افوت مكان مزدحم والمشكلة اني كنت مش فاهم ليش بصير هيك اخوي مرة لاحظ علي وسالني شو اللي صار معك قبل اشوي ؟ وحكيتله هيك هيك . . . حكالي لازم اروح ع دكتور لكن للاسف هاي الحالة ما خلتني اطلع من الدار حوالي خمس اشهر ابداااا ضليت محبوس ما بطلع لا بسيارة ولا باي اشي لانه اي جو زي هيك بتسي الاعراض وهاي الاعراض الموت ارحم منها بكثييير لا توصف وبسببها صابني اشي اسمه وسواس الموت و وقفت حياتي عند هاي الاشياء وكنت دايما حاسس بخمول ومش قادر افكر وقلق شدييييد لاني مش قادر ادرس كل ما بدي اي ادرس نفس بتسكر لا اراديا وضليييت ع هالحالة طوول الفصل. . .  كانت يا دوب دراستي اقدر اقدم فيها وطبعا كانوا اربع مواد ومن ضمنهم انجليزي قدمت الانجليزي والثقافة العامة . . . ف للاسف اجا اول امتحان وانا في هاي الحاله من اول ما طلعت من الدار وانا مش مطمن خايف تجي اعراض النبض وضيق النفس جوا القاعة او خلال الامتحان وبالفعل اول ما طلعت بالسرفيس بلشت الاعراض هاي وطبعا تنكدت لانه خفت كثير انه يصير معي هيك جوا المدرسة كان سواق السرفيس ملاحظ اني متوتر فكنت اقله امشي على ٢٠ ضل على هاي السرعة وضل حتى وصل ولما دخلت المدرسة وطلعت ع الدرج ومع صوت الطلاب العالي اشتغلت الاعراض بشكل عنيييف جدا   ومع الاعراض هاي بتلازمني فكرة اني راح اموووت وبحس كل شي حوالي بقلي اطلع  دخلت قاعة الامتحان اللي هو امتحان انجليزي م ٣ ش ٢٠١٥ و اشتغلت هاي الاعراض في القاعه ف الحل انه اترك الامتحان و اهرب من المدرسة حتى تروح هاي الاعراض 

كانت مغامرة كبيرة اقدرت أباغت و أَتَوْه المراقبين مع اني في حالة توتر شديييييد جدا جدا جدا 

على اساس رايح ع الحمام لكن هربت من المدرسة تركت كلشي في القاعه الدفتر فاضي و ورقة الاسألة على المقعد ما اخذتها معي مع انه كنت شايف ورقة الاسألة و غادرت القاعه يعني قانونيا بنحرم ثلث دورات او اكثر وبتخالف رئيس القاعة لانه في طالب غادر قبل انتهاء الوقت

المهم اكتئبت وحالتي حاااله صارت لانه خسرت الامتحان حكيت لاخوي هيك صار معي . . . طبعا قلي الحل كان انه اذهب للطبيب اعرف شو الحاله الي معي ف ذهبت ل طبيب نفسي  ثاني يوم مباشرة الصبح وكان ماشي بالسيارة على ٢٠ لانه وكنت على اعصابي لاني خايف تيجي الاعراض وصلنا الساعة ١٢ مع انه طلعنا على العشرة الا ربع. . .  دخلت ع العيادة و شافني حكيتلو بصير معي هيك هيك. . . فحكالي  انت بتعاني من حاله اسمها هجوم الرعب بانيك أتاك بالإنجليزي المهم هاي باختصار عبارة عن اعراض بتظهر للشخص في اماكن مغلقه و مزدحمة 

سببها ضغط نفسي ممكن 

ف كتبلي مضاد اكتئاب طبعا كل الامتحانات الي بعد الانجليزي ما قدمتها بسبب هاي الحاله السيئة 

اخدت مضاد الاكتئاب اول اسبوع اسبوعين راحت الحاله اختفت طبعا شعرت ب فرح شديد جدا لانه كاابوس عانيت منه اشهر ولكن للاسف في لسا اشياء بتتعلق في هاي الاعراض بعاني منها حتى هاي اللحظة يعني فعليا لسا  الفوبيا بس بشكل اخف بكثييييير من هاي الفترة المذكورة

ف بدأت الفرصة الاخيرة الي هي ص ٢٠١٥ و بدأت ادرس وأنحت من جديد 

اجت الامتحانات و كانت أيضاً مفاجئة صاعقه 

الي هي امتحان الانجليزي الخرافي ما غيره اكيد كلكوا بتعرفوه بسبب هذا الامتحان استنفذت حقي على خمس علامات انجليزي 

بعد كل الضغط النفسي و الي صار و الاحداث الخرافيه استنفذت حقي مع انه انجحت بالمواد الي بعديه 

وانا كوني الحمدلله صاحب إرادة قوية ما استسلمت و ما ايإست و قررت اعيد التوجيهي كامل من جديد على نظام كل مادة ٣٠ دينار 

قبل بداية الدورة الاولى من المرة الثانيه اشتغلت بجمعية خيرية و شفت الحياة كيف 

دخلنا ع الفصل الاول الي هو الان صار ش ٢٠١٦ و كانت المفاجئة انه راح اقدم ع الانجليزي الجديد 

طبعا غير الاحباط من الجميييع و كل اللي حوالي انه انسا سيبك من التوجيهي  و من هالحكي  الهدام مثل ما وصفته فوق 

بدأ الفصل شفت منهاج الانجليزي الجديد خف عقلي منهاج كبير و مضخم و صعب جدا 

اكتئبت منه 

اجت الامتحانات رسبت فيه م ٣ جديد ومع بداية الفصل الثاني رجعتلي اعراض زي اعراض وسواس الموت ف ارجعت للطبيب لكن هاي المر كان اسمها الوسواس القهري وقعد اسبوعين متذايق منها بس رجعلي الدوا من جديد والحمدلله وقتها مش الامور

نويت اقدم ع الصيف الرابع دمج ع الفاضي رسبت  يعني رسبت انجليزي تالت و رابع و العقدة كبرت عندي لكن مع هيييك 

قلت لااازم انجح و ما ايأست دخلت فصل تالت من المرة التانيه الي هو فصل ش ٢٠١٧ دورت ع شغل  لانه بس عندي مادة وحدة مستويين اللي هي الانجليزي تالت و رابع و بلشت دراسه بالإنجليزي و انا مصررر اني انجح فيه و اكسر العقدة نهائي و ادخل جامعه و أحقق الحلم المنشود من سنة ٢٠١٤ 

اجوا الامتحانات و قدمت المستوى الثالث خبصت فيه 

روووحت ع الدار نفسيتي زباله كنت حاسب انه بجيب ٣٤ يعني راسب و ما كنت حاسب سؤال الكريتيكال 

مع هيك ضليت مصررر الا اكسر العقدة قلت لسا ريلاكس عادي بكرا المستوى الرابع بعوض و بخلص هاد الفصل و اجا ثاني يوم و قدمت الرابع تمام الحمدلله 

و طلعت النتيجة الحمدلله التالت ٣٧ و الرابع ٤٩ 

وهيك الحمد لله انتهى الصراع العنيف بالانتصار على الناس الي راهنت على فشلي 

وانا الان طالب في جامعة مؤتة 

تخصصي لغات انجليزي و فرنسي 

اخترت اللغات حتى أتغلب نهااائيا على عقدة الانجليزي 

ف رسالتي للجميع اياك ان و تفقد الامل و الإرادة وإياك الشخصيات  الفاشله تهزمك

لانه اذا فقدت الامل انت فقدت كل اشي 

طبعا في اشياء اكثر من هيك صارت لكن اختصرتها قد ما اقدر حتى ما تكون القصة ما بتنقرأ

وآسف طولت عليكم 

و ادعولي بالتوفيق 

والله ايوفقكم جميعا